Ich kom noch effe trök oppe boorderi-j van Houtelings Pier uut Stamtäöfelke 79. Dae Pier hoot zoeë umdette op boorderi-j de Houteling woeëndje. En di-j loog aanne ieërtêds hâlfverhaardje wieëg vanne stad richting Iezere Mân, wat allewiel de Parklaan hétj. ’t Pând loog oppe plaats woeë nog steeds de neet mieër in gebroêk zeendje klum- en springtoeëre van de as zoeëdanig neet meer in funksie zeendje kezêrne ligkt. Langs de Parklaan kujje dae-n toeëre nog bewoongere, wi-jte dao stieët te verrosse. Dao opklumme en aafzeile zoeëj eigelik ’n intressânte bieëzigheid zeen vör de azilânte di-j dao zitte, want di-j vervaele zich te börste. Ângers gezâgdj: di-j ammezieëre zich wi-j ‘ne bloodzuiger op ’n loeëje piêp. En ouch de daonaeve ligkendje stormbaan zoeëj ’n good oefenterrein zeen voor aspirânt jihadiste. Mer nog baeter zoeëjtj zeen d’n hieëlen tispel aaf te braeke en mooshuuëfkes van te make vör de bewoeëners van ’t AZC di-j dan tösse de kni-jboeëne en de poor kunne schoefele. De boorderi-j es in de jaore fieftig opgeofferdj aanne kezêrne um mieër plaats te kriêge um seldaote op te leide um in de in dae-n tiêd heersendje kaoje-n oeërlog te vechte. ’t Înkelikke waat nog herinnerdj aanne boorderi-j es de naam Houtelingsweg. En dae wieëg ligkt e paar hongert maeter wi-jjer achter ’t brökske waat vanaaf de Diesterbaan nao Dennenoord létj. ‘ne Kilemaeter wi-jjer keûmtj dae hâlfverhaardje wieëg weer oppe Diesterbaan oet.
En zjuust wi-j allewiel nog, waas de Diesterbaan ’n verlingdje vane Keulerstraot en leep via de Kruuspieël en de scheetbaan di-j dao vreuger loog. ’t Waas doeër de jaore hear ‘ne belangriêle handelswieëg tösse Kölle en Diest.
Ajje neet de Houtelingswieëg opgaotj mer de wieëg nao Dennenoord volgtj, gaoje umtreentj oeëver de zândpaad dae dao vreuger loog en dwaers oeëver ’n militaer oefenterreinke leep. Ouch met ’n soeërt stormbaan met houtere en gemetzje hindernisse woeëje as wichter fein op kosj klumme en vanaafvalle. Mer ’t spannendjst woor ‘ne oongeraerdse gânk in ‘ne berg dae’n indje wi-jjer weer oetkoom. Dao koszje oppe kni-jje doeërhaer kroêpe en det woor toch waal spannendj want aster uch eine tieëgekwoom van d’n ângere kânt inne stikke doonkele, moszje d’r achterstevuuëre weer oet zeen te schravele. Klein wichter maakdje vae bang doeër te zegke det dao de wöllebäö in zoot, mer oongertösse kneipdje vae um zèllef ouch. Soeëmers kwoome vae dao aldaag langs as ve goonge zwumme in d’n Iêzere Mân. En as ve trökkwoome blieëve vae op det terrein altiêd nog effe spuuële en kroeëpe doeër dae-n tunnel. Dan kwoome ve nog zwèrter toês as vuurdet ve goonge zwumme!
© Frits Weerts / Bullseye Publishing
Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.
