Foto Frits: Pater Brugman van ’t kloeëster in Wieërt hoongerte jaore trök.

Oeëti-jje toête eur oeëre ajje met alle mân (mn/vr) aanne stamtaofel zitj en ze prebieëre ammaol tegeliêk wat te zegke. Dan gaon ze mieër en mieër de kael opzette. Mer dan mojje ’s good oplette: mieëstentieds loêstere di-j kallendje minse allein mer nao eur eige, en asze allein mer zoeëje kalle as ze echt wat te zegke haaje, zoeëtj verekkes stil zeen aanne taofel. En dao es niks aan. Kujje netzoeëgood toês bliêve. Of nao ‘ne preek inne kêrk gaon loêstere. Neet det dao wat verstèndjigs gezâgdj weûrtj, mer dan éster teminste mer eine tegeliêk aan ’t woeërd. Det deût os dînke aan de missie-preeke di-j van aodsher op gezatte ti-jje inne kêrreke gehaoje woeërte. Dan stong d’r ‘ne broene pater oppe kânsel te orieëre en dae ammèr nötter gong doon, totdette bekans tufdje van gift. D’r es d’r oeëts eine gewaesj dae maakdje zich zoeë kwaod det de witte koeërd um ziêne boek d’r van aaf zakdje. Zoeëne pater wieës uch met ‘ne houp verbaal gewêldj de wieëg trök nao ’t meûlik paad nao de groeëte gelökzeeligheid. De “Blijde Boodschap” zagte ze daotieëge. Want ajje zoeëne preker zoeëtj geluive, dan dougdje gae en alle ânger minse van geins kânte en waasj hel en verdoemenis waat uch te wachte stong ajje uch neet rap baeterdje. De minse zoote te ri-jjere inne bênk en oppe klapsteûlkes en woore muuskesstil. Ze dörfdje de priddekânt amper aan te kieke, want dae kieëk met zien priemendje ouge dwaers doeër uch hieën. Ge woortj d’r van oeëvertuugdj det dae kakert wul ’s geliêk kost hebbe. Ge kosj zoeëne missiepreek ’t best vergeliêke met eur kommande aan d’n hoond: “Trök de koeëj in”. En det deedje dan met de stêrt tösse de bein. Want as de preek oet waas leepe ze ammaol nao boete met de kop vuuroeëver en de schouwers opgetrokke. Schöldjbewusj. Mer dao waas ’n hallef oor later beej ’t Broên Paerd en kefee Centraal niks mieër van te mêrreke. En beej Amicitia ouneet, deenk ich. En mer good ouch! ’t Laeve gong gewoeën doeër. Ouch zoonger giftige broene pater. ’t Zitj d’r dik in det dae prekert nao aafloup beej d’n daeke e konjekske gong suppe en ’n dikke segaar op stook um op aom te kaome. En um te vertelle waat vör gewillig publiek dette haaj, vuurdette zich weer, indachtig zien gelofte van êrremooj, tröktrok in zien kloeëstercel um te meditieëre oeëver ziêne volgendje donderpreek êrreges in ’t lând. Hebbe di-j boete-preke gehôllepe? Neet um os braver te make. Want dao mêrkdje allewiel gein fluit mieër van.

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.