Juzzusmiranta, dit es gei waer vör ‘ne blânke! Zégke vae dieëze zoeëmer. En det zoonger te diskriminieëre, want minse oet de trope kinne now eimaol baeter tieëge de hitst as vae bleîkschieëte. En di-j minse zeen dan ouch neet lui, waat vae ammér dachte, mer dieëje langzaamaan, zjuust wi-j vae met dieës daag zoeëje motte doon. Vae kunne dao dus nog wat van ópdoon. Eìn dînk doon ve vlotter met dieës daag: e pîlske höffe, oet de zon, inne scheem en asj kân met e tikkelke wîndj.. En begintj mich noow neet te schiêtschoeëtele dejje met zoeë e waer gawwer ‘ne swieps hetj, dé’s zanik. Ajje fotoos zeetj van heite zoeëmers van vreuger, zoeë-as beej Klein Karelke in 1920, ’t paviloen vanne Iêzere Mân in ’25, Verspage in ’47, zeeje midde oppe middeg toch mén zitte met groeëte potte beer vuur zich. Dorst leûtj zich neet betuuëgele! E groeët verschîl es de klei-jing vanne vröllie van toen en allewiel. Aane stamtaofel zeen ve ’t dao roerendj oeëver ins. Vreuger gongdje allein aaf op ’t snuuëtje waat tösse de groeëte sombrero-èchtige hoed en ’t kânte kraegske oetkieëk en e paar scheûnkes oonger de înkellang schörte. En dan al dan neet met rooeëj lupkes. Allewiel bieftj d’r weinig te raoje oeëver met di-j hotpêns en tup-beschêrremers. Ofschoeën d’r völ vröllie zeen di-j völ baeter wat mieër aan koste doon um d’r proônter oet te zeen, as met de spekrölkes di-jze noow laote zwabbere. En neet allein aanne Iêzere mân! Gaotj beej Guido of de Gruyter op ‘t terras zitte en ge kunt ‘ne alikke ensieklopedie samestelle van ’t ras homo erectus. Zoeëver ajje dao zèllef gein last van kriegtj. Nein, det zoot vreûer toch wat ângers innein. De mèn oppe foto loupe met di-j badklei-jing neet oeëver de mêrrentj en zellefs neet mieër beej d’n Iêzere-Mân. Nein, di-j zeen (hieël beschaafd???) in Oostende aant strand van de Noeërdzieë aant bade. En ’t zeen Wieërter joonges in 1925. Ongetrawdj en op jacht nao …..???? Det stieëter neet beej. Wildje wieëte weemtj es? Oonger van lînks nao rechs: Alouis Grein, Maantje Stribos. Boeëve: Harrie Weerts en Pierre Teunissen. Sjarmânte joonges hé? Ge motj uch vuurstelle det Oostende aanne Bêlze kust, toendertiêd nondedjus wiêt ewèg waas. Allewiel zeeje gawwer in Tblisi (det ligktj êrreges in Georgie, voormalige Sovjetstaat) as toendertiêd met de stoumtrein van Wieërt nao Antwerpe (jao, dae leep d’r toen) en dan oeëverstappe oppe vollegendje stopstoumtrein nao Oostende. Dao woordje drejkwaart daag mej oongerwieëges. En ge haatj gein vieërtieën daag verkânsie. Hoeëgoet ‘ne daag of twieë-drej. En ajje dan de vri-jje zoondig d’r beej pakdje (want saoterdus-sfuuërmiddes moszje nog wêrreke!) en ge kosj ’t betale, gongdje nao ’t strând aanne Bêlze kust. As dieës mèn noch zoeëje laeve, woore ze roontelum 120 jaor aod. Ve kunne ’t ze dus neet mieër vraoge wi-j ze dao getempieësj hebbe. Want woeërum gongdje ângers nao Bêls? Ich dörref d’r wat oonger te verwedde det ze oppe trökreis in Diest oetgestaptj zeen en ‘ne trein oeëverslooge, want dao waas ’n bekindj kefeeke (met roondborstige kasteleinse ) di-j ze bliekbaar good kindje. Gaeftj ze ’s ongeliêk? Vae woeëje toch gaer ’t zelleje doon? Allein wille vae binne drej oor in Kuala Lumpur zeen. Weem veertj d’r noow verkânsie? Zeuj of vae?

© Frits Weerts / Bullseye Publishing

Boek Stamtäöfelke kopen                               
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.