©Fotografie Vanderfeesten, Maaspoort 64, 6001 BR Weert

Ich heb al ’s oeëts geschrieëve det vae achter inne hoeëf vreuger ‘ne Lourdesgrot haaje. Met ‘ne boeëg woeë dejje met eur fietske lekker ongerdoeër kosj kèrre. In völ hoêzer haaje ze zoeëne grot. En oeëverâl zooge ze d’r umtreentj ‘tzèlleje oet. ’t Tuindje nèt echt mer det waas kloeëteri-j, want ‘t woore ammaol opeingemetzje zîntels uut d’n oeëve vanne Zînk in Dorplein. D’r woore mer twieë echte in Wieërt. Eine stong, en stieët nog, in ’t Moêzelkepèlke en d’n ângere in d’n hoeëf van de nonnekes inne Maasstraot. Van ’t bestaon van dae léste woore de mieëste minse neet oppe huuëgdje, want in dae-n hoeëf mochdje neet kaome. Dao hoezje slotzusters en dao kwoom, behalleve ‘ne geistelik vör de spirituwele beejstand, beechte en de més doon, neeme binne. Allewiel kujje in dae-n hoeëf nao meziek loêstere, wat drînke en uch verpoze. Hieëlemaol neet onaeve!

Mer as ich dao oeëts bin, schutj mich tebinne wi-j ‘t dao vreuger towging. Kloeëster Maria-Hart inne Maasstraot waas indertiêd ’n pauselik slot, waat inheel detter streng regels golde vör de nonnekes di-j daobinne laefdje. Ze kwoome allein mer boete um nao d’n tandarts te gaon en te gaon stumme in ‘t aod stadhoês oppe Mêrrentj. En noeëts allein! En met ’n vuuëlke vör de auge. De hieël kloeëstergemeinschap ging in ganzepas doeër ’t daeke-stieëgske naeve de kêrrek op nao ’t stadhoês um te stumme. ’n Köstelik gezicht, woeë ouch nog fotoos van zeen. Mer ze veerdje waal Sinterklaos! Jaorelânk waas Leike de Borgie de Sinterklaos van Vinsênsius en ich waas Zwêrte Piet as ve kedootjes beej de nonnekes mochte brînge. Toen nog zoonger diskriminasie!

Ge woeërtj doeër Drina, de hoêshaodster, binne gelaote in de ontvangkamer. Achter ’n houtere loêk van ‘ne maeter of twieë breid en eine hoeëg, huuërdje ge wat gemummel en vör de rest waasj stil. Tot ’t loêk oeëpe ging!!!!! D’n ieërste kieër det ich det zoog, schrok ich mich kepot. Achter det loêk woore twieë ruuësters van dikke tralies di-j zoeëwiêt uutein stoonge dejje met eur hand de twieëdje tralie neet kosj aanrake. En dao-achter stoong ‘n klocht nonnekes, di-jje dus gein hand kosj gaeve. Ge kosj allein de köpkes met det apaart kèpke ontware. De snuutjes woore amper te oongerschei-je.

En dan begoste di-j zusterkes ’n sinterklaoslidje te kwele waat ich nog noeëts gehuuërdj haaj, mer zieëker van vuur WOI woor. Leike kindje ’n paar nonnekes van naam di-j van Wieërt vandan woore en dao kaldje hae dan plat tieëge. Gegiechel wi-j ’n schoeëklas jong pölle. Mejjèh, Sinterklaos mot toch kedootjes gaeve? Di-j koszje onmuuëgelik doeër di-j tralies gefroemeltj kriêge. Dao haaje ze wat op gevoonge. Oonger ’t traliewêrreke woor ’n schuuflaaj ingebawdj. Ajje di-j nao uch tow troktj, koszje dao ’t kedootje inlegke en trok moôder abdis de laaj nao zich tow en pakdje ’t d’r oet aan d’n ângere kant van ’t Iêzere gerdien. Déks waasj ’n reep sjeklaat of e pèkske speklasie. Of èppelkes en paerkes van marsepein. Niks van ‘n likeurtje, sjerrieke, fleske wiên of zoeëwat. Ve hebbe waal ’s tandebörstels (schoeën verpaktj in sinterklaospepeer) doeër de laaj geschoeëve, want dao haaje ze um gevraogdj. Di-j zusterkes verrèkdje ouch nog vanne êrremooj. AOW bestong toen nog neet. Mer âl waat ze haaje waas gemeinschappelijk bezit, zag moôder abdis. En di-j tandebörstels dan?

© Frits Weerts / Bullseye Publishing

Boek Stamtäöfelke kopen                               
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.