Boezjieëre: frits.pop@ziggo.nl Foto GAW. In de sirkel de Aardrijkskundeklas van ’t Kleezje.

Midde of indj jaore fieftig vanne vuuërige ieëw (vör aojer minse liêktj det géstere) woeërt d’r opt kleezje ’ne lieëraar Îngels te kinne gegaeve dette mer baeter op kos krasse. De rieëje woeërum det gebuuërdje zoeëj allewiel in aanmerking kaome vör ‘ne gouwe Lambieck. Ziêne zoeën Peter haaj zich in Indjeve tieëgen-oeëver de aoj stasie in ’n bookwînkelke ’n pruuses blaedje gekochtj van de FKK. (FreiKörperKultur) Dao stoonge bloeëte vröllie in. Vör tieëgewoeërdige begippe nog proontelik netjes. Mer aevegood: ze haaje niks aan. En allewiel zoeëje vae aan di-j12 aafbieëldinge ouch niks mieër aan vînge. Mer vae wiste allemaol van ’t bestaon van det wînkelke en haaje wul ’s, as ve in Indjeve woore, vör de glaas gestânge um nao di-j bukskes te kieke, mer de intresântste deile woore sekuur met plékbând aafgeplektj. Mer noow haaj dae Peter zoeë-n bukske te pakke, zoonger plékbând! En dae stommerik gong daomej opschöppe! Wi-j kujje zoeë onnuuëzel zeen op ’n schoeël woeë katteliek in hoeëfdletters, vét gedröktj en oongerstreeptj geschieëve woeërt en allein mer zwertrokke roondleêpe! En woeë interne lieërlinge op zoote, di-j drej kieër per jaor inne verkânsie vröllie zooge, en dan woore det nog eur eige zösters en mooder. As di-j oet de raam van de aardrijkskundeklas nao boete loordje en aan de oeëverkânt vanne van Berlostraot de maegdjes vanne MMS ontwaardje, lieëk ’t d’r op of ze spontaan en kakendj aan eur gereef kwoome. De gekke! Mojje naogaon: de roête woore tot op oughuuëgdje gemattieërdj, um de pupille neet in verleiding van det vrouwelik schoeëns te brînge!  Ze moste dus op eur tieëne gaon staon um ze te begape. Det bloeëte-dames-bukske kos dus neet lang geheim bliêve. Ich gluif neet detj ’n oor gedeûrdj hieët, nao dette getrappieërtj woor, det Peter vör de léste kieër de port vant kleezje achter zich tow kladzje.  En toen woeërt ziên vader met dit godsontieërendj feit gekonfrontieërdj.  Allicht weit ich neet waat dao binneskaners bekoonkeldj es, mer ’n puuëske later stong meister H in Scharn beej Mestreecht aant kleezje Îngelse les te gaeve en neet mieër aant kleezje in Wieërt. En hevve ‘m heej neet mieër gezeen. En hae waas nota bene erebörger van Wieërt en haaj ’n paar funksies int vereinigingslaeve! Nog noeëts es eeme met zoeë-n stil trom vertrokke. Dé’s umtreentj sestig jaor gelieëje. Vreuger mogte de jong segrette rouke waat ze woeëje. Mer haaje ze ’n kepotje oppe tes, dan koszje opkrasse vanne schoeël. Allewiel moogdje neet mieër rouke, mer weûrtj ze waal aangeraoje um, in vuurkaomendje gevalle, ’n kepotje beej de hând te hebbe. Wi-j ti-jje toch kunne verângere. En um fotoos van bloeëte vröllie te zeen, hooje neet mieër nao de kapper te gaon um stiekem in De Lach te blare, want in eedere gezet stieët allewiel mieër bloeët as woeëje vreuger vör van schoeël gestâmptj woeërtj. En beej Merie van Pietje Kamp, achter ziên etalaazjeruutje, hoonge anzichtkaarte met astrânte vrommesse in ’n badpak woeëvan ve noow zoeëje zegke: Kiektj dao waat ’n zieëta. Oeës auge zeen bliêkbaar verwintj awiel en dao ligke ve neet mieër van wakker. Of gae waal?

© Frits Weerts / Bullseye Publishing

Boek Stamtäöfelke kopen
’t Book es te koup beej de bookhândel (Bruna, Primera), de oetgaever Bullseye Publishing en beej Frits zelf (bestelle via e-mail) vör de priês van 24 eurokes.